نساء من نار

الساحر

#الساحر قصة قصيرة

دخلي محفوظ سكرتير العيادة في توتر وهو بيقولي ..

محفوظ :: دكتور مروان .. في شاب دخل من شوية عمال يدخل الناس كلها قبله .. وانت شايف النور كل شوية يقطع ! والصراحة انا خايف.

انا :: مين ده ياعم محفوظ .. وبعدين مش عارف مال النور !! متشغل المولد

محفوظ :: مش شغال يادكتور و ..

انا :: عم محفوظ .. دخل الواد ده ومتقعدش ترغي معايا كفاية المرضي ال قصصهم كلها متشابها النهاردة ، يلا ..

ولعت سجارة .. وفضلت مستني الشاب ده ، ودخل ، شاب في منتصف التلاتين ! ، كان بيبص في كل ركن في العيادة ، ماشي ببطيء شديد لحد مقعد علي الكرسي .. قدمت التحية ! .. وبعدها قولتله

انا :: ازيك منورني ، واضح انك قاعد من بدري ، اتشرف بيك !!

- مش مهم ..

ضحكت وانا من جوايا بغلي ، بس اين كان مريض ..

انا :: ازاي مش مهم ، انت جي لدكتور نفسي ..

فضل يتلفت تاني براسه في المكان وبيبص في كل حته .. وهو بيهز راسه ..

- عارف .. عارف اني في عيادة دكتور نفسي .. بس هي ال قادتني لهنا ، انا مش مخطط اني اجيلك ..

انا :: طيب خيلنا ندردش شوية ومش مهم اسمك ، مالك ؟

سعد :: لا لا .. انا اسمي مش سر ! اسمي سعد ومش عارف هيفيدك بايه.. بس انت عايزني احكي صح ؟

انا :: ياريت ياريت .. بس !! ده لو انت حابب طبعا !!

سكت شوية وبعدين قالي

سعد :: ينفع اطلب قهوة ؟

انا :: اكيد ..

رنيت علي الجرس عشان يدخل محفوظ بتوتر ، وهو بردو بيتلفت في الغرفة .. هو ايه ال حكاية !! قطعت انتباهه

انا :: محفوظ .. محفووظ !! ركز معايا !! اعمل لاستاذ سعد كوباية قهوة ..

خرج محفوظ .. وسعد ولع سجارة وبصلي وقال ..

سعد :: ابويا راجل صعيدي من قنا شغال مزارع ، اما امي ، ست اصيلة ربة بيت ..! مكنتش بتخلف ، سرحت وحفيت علي الدكاترة والدجالين ، مكنش في نتيجة لحد موصلت 50 سنة .. لحد ماجه ساحر وقالها

الساحر :: يانعمات .. مش نفسك تخلفي ..

نعمات :: ياااه ياسيدي .. ده كان من زمن خلاص !!

الساحر :: بس انا ممكن اساعدك انك تخلفي

نعمات :: ازاي !!!! انا عديت ال 50 ..

الساخر :: ازاي دي بكره اقولك عليها ..

اختصارا للوقت ووقت المرضي ال برا .. خلاها تدبح د*ك !! .. وتشرب حاجات غريبة وتبات ليلة في القبر بعد جماع من ابويا .. وبعدها ، اكتشفت انها حامل ! بقي النجع بتاع قريتنا ملوش حديث غير امي وابويا والساحر المب**ك .. متبصليش كده ، الدجاال مبيقولش علي نفسه دجال بيسمي نفسه ساحر.. وظهر سحره فينا .. لحد مانا جيت !!

بس من وانا صغير حياتي بائسة ، انا عايش بلعنة وفي ناس بتقول انها ميزة ، انا بشوفهم ، بشوف ال انتو مش بتشفوا .. وبكلمهم !! .. وبيكلموني ..! ممكن انت متصدقش ، بس ياما قبلك افتكرني مجنون ..!

دخل محفوظ واول مدخل رمي القهوة !! من الخضة !! لدرجة اني اتفزعت

انا :: في ايه ياعم محفووظ !! خضتني

محفوظ :: ممم .. ممم مفيش يادكتور !! هعمل غيرها ..

كنت متوتر .. وسعد علي نظرته ابتسامه غريبة !! ..

سعد :: عايز تعرف .. محفوظ اتخض ليه

بصتله بتعجب وانا بقوله :: ايوه ياريت ..

سعد :: شاف ال انا شايفه ! ال انت مش هتشوفه !! شاف انعكاسه علي المرايا اللي وراك واختفي اول مدخل محفوظ ..

انا :: مين ده !!

سعد :: بنت لابسه فستان اسود ..وجزمة بيضة .. شايله شنطه صفرة .. بتبصلك بحقد شديد !!

اتوترت .. سعد مش اول واحد يقول الكلام ده !! المرضي كلهم النهاردة بيقولوا كده ..! كنت خايف وبتلفت .. وسالته

انا بخوف :: انت .. انت جي هنا ليه !!

سعد :: شوفتك امبارح في مول كبير .. ! ال لاحظته انها ماشية وراك زي ضلك وخيالك .. بتبصلك نظرات انتقامية غريبة !! .. سالتها مالك .. مردتش عليا !! اول مرة واحد فيهم ميردش عليا .. لقيتها بتتبعك لحد هنا .. وعشان كده جتلك !! ال عرفته انها هتحاول تقتلك بسبب معرفوش وانا هنا عشان احذرك ..

كنت خايف .. اول مرة يجتمع ناس علي التخاريف دي .. بواب العمارة امبارح قالي نفس الكلام ..!! الجرسون في الكافية نزل مشروبين وقالي للانسة بنفس الموصفات .. مش معقول ، ايه ال بيحصل !! ..

انا :: طيب .. طيب يا استاذ سعد .. تقدر تقولي !! تقدر تقولي اخلص منها ازاي ..

سعد :: الحل عندي تحكيلي ،وانا ابعدها عنك بمعرفتي ..!!

كنت متردد احكي .. وقولتله تعالي معايا !

اخدته في العربية .. ووديته المقطم ! حفرنا قبر كبير .. كان فية البنت دي ! بصلي وقالي

سعد :: ياااه .. ده الموضوع طلع بسيط .. احكيلي !!

كنت متردد وخايف .. بس حكيت

انا :: سوزان .. سوزان كانت مراتي القديمة ! اكتشفت خيانتي ليها في العيادة مع مريضة، قعدت تزعق وفضحتني لولا ستر ربنا مكنش في غير عم محفوظ والمريضة والا سمعتي كانت هتبقي في الطين .. طلبت الطلاق ، سوزان كانت غنية جدا !! .. وانا متجوزها عشان فلوسها ..!! خوفت وعشان كده قتلتها !! .. ودفنتها هنا .. االشرطة حتي ملحظتش اختفائها ، حققوا معايا كتير بس كان كلامي معرفش فين !! وانها قالتلي انها هتمشي بشهادة محفوظ في العيادة .. وعشان كده الموضوع عدي .. بس الغريب ال جد من اسبوع ده !! ال بيحصلي في شقتي .. من الخدم والبواب والحاجات ال مش بلاقيها .. حاجات كتيرة كانت بخط اديها ورسايل بلاقيها في الشقة مضمونها مش هسيبك في حالك .. ده غير الحمام والطرقة ال ديما بسمع في صوتها وهي بتقولي مروان!! ارجوك ساعدني انا خايف ..!!

ضحك .. ضحك وقالي .. مش عيب ؟ مش عيب دكتور زيك يصدق التخاريف دي ..!! كان عربيات الشرطة بتقرب ..!! مكنتش فاهم حاجة ، كان بيضحك ويقولي ..

سعد :: اثناء عملي ، كظابط مباحث مشوفتش اغ*ي منك ..! قولت الحوار ممكن ميدخلش عليه والعلم والتهريج ده ، بس جابت نتيجة .. اه اه .. مستغرب صح !! محفوظ بشوية ضغط قالنا سوزان خرجت وانت خرجت وراها ع** ال قالو في التحقيق ..! النور ال بيقطع كان هو ال بيعمله ، والمرضي كلهم تبعنا .. الجرسون ال قبلته في الكافية ده كان مترتب كل حاجة .. بالاضافة للبواب والخدم ال ساعدونا في انهم يعرفونا خط سوزان !! وشريط الفيديو بتاع عيد ميلادك ال بتقول في بصوت عالي كل سنة وانت طيب يامروان ، وقصينا مروان وبمساعدتهم كانا بنشغلها.. بس الشهادة لله يادكتور .. انا !! انا اندمجت في الدور وصدقني كان نفسي يطول اكتر من اسبوع ..

لقيت قوات من الشرطة بتحوطني وبتحطني في البو** .. انا ساذج .. ساذج كبير !

#تمت