في قلوب العاش*ين

في قلوب العاش*ين البارت السابع من الجزء الثاني

حور كانت بتتكلم مع مامتها وقالت لها : اهدي بس يا ماما عشان اعرف افهم في ايه .. ايه اللي حصل يا ماما مين اللي مضايقك ..

مامت حور : تعالي مش هينفع احكي في التليفون تعالى دلوقت حالا .. حور قالت لفارس : شكل في حاجه حصلت انا لازم اروح على البيت دلوقت حالا ..

فارس : انا مش هاسيبك لوحدك وهاجي معك .. فارس اخذ حور واستاذنوا من عا** انها لازم تمشي وراحوا على البيت عندها لقوا مامتها عماله تعيط ..

حور : في ايه يا ماما .. ايه اللي حصل ..

مامه حور : اللي اسمه محمد ده اللي كان عاوز يتجوزك طلع وقعد يزعق بصوت عالى ويقول لى : انتم عشان الراجل اللي كان عايش معاكم مات هتلفي انتي وبنتك على حل شعرك .. و خلي الناس كلها تتكلم علينا .. انا مش عاوزه اقعد هنا في البيت ده لحظه واحده يا حور انا اتفضحت في المكان ..

حور : والله ما ها سيبه و هانزل دلوقت و هتشوفي هاعمل ايه .. فارس مسكها من ايديها وقال لها : مش هتنزلي يا حور وما تتكلميش معاه خالص انا اللي هاتصرف معاه ..

حور : انت عاوزني اسكت له عشان يفتكرنى انى خائفه منه .. والله ما هاسكتله .. نزلت حور على تحت وقعدت تنده عليه بصوت عالي .. جه وقال لها : عاوزه ايه مني ..

حور : ايه اللي انت رايح تقوله لامي ده انت اتجننت في عقلك ولا ايه .. مين دول اللي ماشيين على حل شعرهم انت عارف انت بتتكلم مع مين ..

محمد : عارف كويس بقي تبيعيني انا عشان واحد غنى و معاه عربيه والله ما هاسيبك يا حور ولا هسيبه .. فارس نزل على تحت ومسكوا من هدومه وقال له : انا ممكن اسجنك وما تخرجش من السجن ده ابدا .. بس انا مش هاعمل كده عشان خاطر حور .. ابعد عن حور وده اخر انذار ليك ..

محمد : تصدق خوفت منك وراح ض*به في دماغه جامد فتح له دماغه ..

حور : فارس انت بتنزف .. فارس مسك محمد قعد يض*ب فيه والناس تحوش و بعدوهم عن بعضهم .. حور اخذت فارس وطلعت على فوق وقالت للناس اللي واقفه : فارس ده يبقى خطيبي وما فيش احد فيكم ليه اي حاجه عندنا .. طلعوا على فوق وحور قعدت تقول لفارس : انا اسفه اني عرضتك ل المشاكل دي ..

حور : يا ماما هاتي لي قطن بسرعه وحاجه اطهر بها الجرح اللي في دماغه .. مامتها دخلت جابت لها من جوه وقالت لها : انا هاروح اعمل لكم لقمه تاكلوها ..

حور قعدت تحط القطنه على دماغ فارس وتشيل الدم من عليه وتقول له : تحب نروح المستشفى ..

فارس : لا دي حاجه بسيطه وبعدين انا مبسوط جدا اني قاعد معاكم هنا .. انا كل يوم هتعور بقى عشان تيجي تنظفي لي الجرح وراح ماسك ايديها و باسها وقالت له : انت في ايه ولا في ايه .. بس يا فارس ده لو عاليا هانم عارفه الكلام ده مش هتسكت لنا و هتعمل مشكله كبيره ..

فارس : ومين قال لك اني هاقول لها .. عادي كاني وقعت في الشارع او حصل اي حاجه .. وبعدين سيبك من عاليا هانم دلوقت .. انت مش ملاحظه ان مامتك دخلت المطبخ واحنا قاعدين لوحدنا ..

حور : وفيها ايه يعني ..

فارس : ما فيهاش حاجه يعني انت مش عاوزه تديني بوسه مثلا عشان اتض*بت بسببك ..

حور : لا لما نتجوز ان شاء الله ..

فارس : دي اسما كانت بتبوسنى ليل نهار .. اشمعنى انتي مش زيها ..

حور : لا احنا ما عندناش الكلام ده .. الكلام ده ما بيحصلش غير بعد الجواز ..

فارس : وانا ان شاء الله هاعجل بالجواز عشان نفسي ما نسيبش بعض لحظه ثانيه ..

حور : ان شاء الله يا فارس مش هنبعد عن بعض ثاني ابدا .. دخلت مامت حور ومعاها الاكل وقالت ل فارس : معلش يا ابني حاجه بسيطه ..

فارس : الاكل ريحته جميله اوي تسلم ايدك والله كفاية انك تعبتي نفسك و عملالي الاكل بنفسك ..

مامت حور : طيب يا ابني هسيبكم بقي براحتكم تاكلوا مع بعض .. خرجت مامت حور برة وفارس و حور كانوا قاعدين مع بعض ياكلوا ..

فارس : تعرفي ان مامتك اكلها حلو اوي بجد فكرتني ب ايام زمان ايام جدتي الله يرحمها .. بقالي كتير اوي ماكلتش اكل حلو اوي ..

حور : بالهنا والشفا يا فارس ياريت تيجي تقعد معانا كل يوم والله ..

فارس : انتو الي هتقعدوا معانا يا حور انتي و مامتك و اخواتك انا مش هاسيبك قاعدة هنا وسط الناس دي لمي كل حاجتك عشان تيجي معايا انتي و اهلك كلهم ...

حور : انت بتقول ايه يا فارس انت عاوز عاليا هانم تمشي وتسيبلك البيت كله ..

فارس : لا والله بالع** دي عوزاكم تيجو تقعدوا معانا فالبيت حتي هكلمها قدامك وتعرفي بنفسك ..

حور : لا طبعا يا فارس انا مش هقبل اني اروح اقعد عندكم في البيت وماما كمان مش هتقبل .. اقفل الموضوع ده يا فارس وما تفتحوش ثاني .

فارس : انا خايف عليكي والله يا حور ومش عاوزك تقعدي في المكان ده لوحدك انت ومامتك واخواتك عشان واضح الناس اللي هنا بتوع مشاكل وانا مش هسيبك هنا لوحدك ..

حور : وانا مستحيل اقبل ان انا و اهلي نيجي نقعد عندك فالبيت و مش عينفع نتقل عليكم ..

فارس : ليه مش احنا قريب هنتجوز وهنبقي عيلة واحده ايه الي انتي بتقوليه ده بقي .

حور : انا بقول نكمل اكل احسن وبعد كده نبقي نشوف الموضوع ده ... وهما قاعديني ياكلوا تليفون فارس رن مامته كانت بتتصل بيه ...

فارس : ايوة يا ماما خير ..

عاليا : غريبه يعني يا فارس يعني مجتش الشركه انا هناك من بدري مش قولت هتيجي علي طول ..

فارس : ايوة انشغلت كده مع واحد صاحبي شوية و هبقي اجي ..

عاليا : واحد صاحبك برضه عالعموم يا فارس براحتك اعمل الي انت عاوزه بس انا مش هرجع في كلامي ..

قفلت عاليا مع فارس و هي متأكده انه مع حور مسكت تليفونها وقررت انها تكلم اسما .. ردت عليها اول ما اتصلت ...

اسما : ازيك يا طنط عاليا وحشتيني اوي ..

عاليا : انتي فين يا اسما و اختفيتي ليه كده انا عاوزه اشوفك ..

اسما : انا في مصحه نفسيه يا طنط من ساعه المشكله الي حصلت بيني و بين فارس .. انا تعبانه اوي و مش عارفه اعمل ايه .. نفسي اموت و لا اني اشوف فارس بيبعد عني

عاليا : هو ده الي انا عوزاكي فيه يا اسما .. قابليني كمان ساعه في الكافيه الي حنب الشركه ...

نزلت عاليا قعدت في الكافيه تستني اسما و اول ما وصلت صعقت من منظرها .. شكلها اتغير جدا وملامحها اتبدلت ... خست جدا وتحت عنيها اسود من قلة النوم و كتر التفكير ...

عاليا : ايه الي حصلك يا اسما و ايه الي انتي عملتيه في نفسك ده .. هي دي اسما اجمل بنت في العيله .. يا خسارة يا اسما كنتي جميلة ..

اسما : هعمل ايه يا طنط عاليا الحياة بقت صعبة اوي من غير فارس مش قادرة اكمل حياتي من غيره خلاص ..

عاليا : انا بقي مش هخلي فارس يتجوز غيرك علي جثتي يا اسما انه يتجوز الي اسمها حور دي ...

اسما : حور !!!

يتبع