في قلوب العاش*ين

إنتصار الشر

لقوا فارس داخل وبيقول لها : عامله ايه دلوقت يا ماما يا رب تكوني كويسه ..

عاليه : انا يا حبيبي كويسه ما تقلقش عليا هو بس شويه صداع خفيف على نغزه كده في قلبي .. بس الحمد لله يعني انا بخير ..

فارس : اهم حاجه عندي يا ماما صحتك تكون كويسه .. وكل اللي انتي عاوزاه انا هاعمله لك يا حبيبتي .. هو انا ليا حد غيرك برضو ..

عاليه : انا عارفه يا حبيبي انك بتحبني وعاوز ترضيني باي شكل .. وانا برده باحبك وعاوزه ارضيكي .. شوف يا ابني اللي انت عاوزه مش مهم انا حتى لو هاكون زعلانه في اي قرار انت هتاخذه .. انا اهم حاجه عندي انك تبقى سعيد ..

فارس : لا يا ماما المهم دلوقتي صحتك سيبك من اي حاجه تخصني خالص .. دلوقتي انا عاوز اطمن عليكي واشوفك مالك .. هو انتي تعبانه كده يا ماما بقى لك قد ايه ..

عاليه : والله يا حبيبي انا بقى لي فتره باحس بتعب بيروح ويجي يعني .. بس ما كنتش اعرف اني هيجي في يوم وهاوقع الوقعه دي .. مش عارفه انا ليه مهمله فنفسي بالطريقه دي ..

فارس : بعد كده يا ماما لما تحسي انك تعبانه او فيكي اي حاجه نروح نكشف على طول .. بلاش تهملي في نفسك هو احنا لنا احد غيرك برده ..

عاليه : ربنا يخليك لي يا حبيبي ويخلي لي اسما .. واقفه معي من اول لما تعبت البنت دي انا باحبها جدا ربنا يخليها لي ..

فارس : طيب يا ماما انا واقف بره لو احتجتي اي حاجه قولي لي انا مش هاروح البيت النهارده ..وطلع فارس بره وحور كانت مستغربه جدا عشان هو كان بيتصل بها كثير قوي وفجاه اتصالاته اتقطعت بها وكانها ما بقاش في حاجه ما بينهم .. فات يوم والثاني وفارس اتقطع الاتصال بحور .. كان مشغول بمامته جدا قررت انها تكلمه تسال على مامته عشان عرفت انها لسه محجوزه في المستشفى فقالت انها هتنسى كل حاجه دلوقت وتتصل تسال على عليا .. مسكت التليفون واتصلت بفارس .. كان قاعد ساعتها مع مامته في الاوضه .. راح مكنسل عليها عشان ما تشوفهوش وهو بيكلمها وتضايقة .. و استغربت جدا انه ما بقاش يرد عليها .. وبعد 10 دقائق خرج بره اتصل بها من بره .. فارس : ايوه يا حور ازيك ..

حور : انا باتصل اسال على والدتك هي عامله ايه دلوقتي .. يا رب تكون بخير ..

فارس : للاسف هي مش بخير يا حور وتعبانه جدا والدكتور قال لي انها عندها مرض خطير ونادر وما ينفعش تستحمل اي زعل ..

حور : ربنا يشفيها يا رب انا والله ما كنتش اعرف الكلام ده الف سلامه عليها يا فارس ..

فارس : الله يسلمك يا حور .. بعد اذنك انا هاقفل دلوقت عشان انا قاعد مع ماما جوه في الاوضه وهي تعبانه شويه .. حور قفلت معاه وتيقنت ساعتها ان فارس ما بقاش زي زمان .. ومش هيفضل معها بسبب مرض مامته لانه رمالها كلمه بيقول لها فيها ان مامته تعبانه والدكتور قال ما ينفعش اي زعل عشان صحتها

. عرف ساعتها انه هيبدا يبعد عنها واحده واحده بسبب مامته ومرضها .. قررت انها هترجع ثاني الشغل بتاع عا** وهتنسى موضوع فارس نهائي لكن كانت زعلانه جدا على نفسها ومتاثره .. لانها كانت بتحب فارس من كل قلبها فما كانتش تتوقع ان يجي اليوم ويبعده هما الاثنين عن بعض .. عاليا بدات تتحسن كانت عامله نفسها انها بدات تتحسن وتبقى سعيده .. وكانت كل ما فارس يقرب من اسما يبان على وشها السعاده .. فارس كان بيعمل كده غصب عنه عشان يرضي مامته وما كانش يعرف ان كل اللي هي عاملاه ده مجرد تمثيليه عشان تبعدوا عن حور .. هو كان بيكلم اسما غصب عنه لكن حور كانت شاغله كل تفكيره .. بس ما كانش بيحاول يرجع يكلمها ثاني عشان ما يحنش من ثاني .. ومامته تعرف وساعتها ممكن يحصل لها اي حاجه .. روحوا على بيتهم و اسما كمان روحت معهم وقالت لفارس : انا هاقعد هنا مع طنط عاليه مش هاروح بيتنا انا قلت لماما ان طنط عاليه تعبانه وهي قالت لي خليني قاعده معاها هنا ..

فارس : مش عارف اقول لك ايه يا اسما .. انتي انسانه جدعه وواقفه جنبنا من اول مرض ماما ..

اسما : ما تقولش كده يا فارس انت ما تعرفش انتم غاليين عليا قد ايه انا لو اطول هاخدمكم بعيني هاعمل كده .. هو انا ممكن اقعد اتكلم معك شويه يا فارس . فارس : خير يا اسما اتفضلي ..

اسما : هو انت ممكن تديني فرصه ثانيه اصلح الغلطه اللي انا غلطتها في حقك ..

فارس : اتطمن بس على ماما يا اسما وبعد كده نبقى نتكلم في الموضوع ده ..

اسما : يعني انت المبدا عندك موجود ممكن تديني فرصه ثانيه في يوم من الايام ..

فارس : جايز طبعا يا اسما اد*كي فرصه ثانيه بس انا مش قادر اتكلم في الكلام ده دلوقتي .. عشان انا قلقان على ماما جدا وخائف كمان من كلام الدكتور بافكر اجيب دكتور ثاني يبص عليها ..

اسما : لا اوعى تعمل كده .. طنط عاليه قالت لي انها مرتاحه جدا مع الدكتور بتاعها ده ومش بتحب تكشف عند احد غيره .. بلاش تعمل كده ..

فارس : انا اكيد هاخذ رايها الاول وبعد كده هابقى اجيبه .. بس سيبيني دلوقتي يا اسما اشوف هاعمل ايه في الموضوع بتاع ماما ده ..

اسما : ماشي يا فارس هاسيبك انا دلوقتي .. دخلت اسما عند عاليه الاوضه وقالت لها : اتكلمي بقى معي في الموضوع بتاعي انا وهو يا طنط عاليه انا رميت له كلمه كده اني عاوزه ارجع له ثاني وحاسه انه ما عندوش مشكله .. حاولي انتي تتكلمي معه وتقولي له انك حابه اني انا وهو نرجع لبعض يمكن يوافق .. ارجوكي كلميه في الموضوع ده ..

عاليا : ما تقلقيش يا اسما كل شيء بأوانه ما فيش حد هيتجوز فارس غيرك انت بس .. انتي خطيبته من الاول وبنت عمه اي نعم انتي ليكي تصرفات مجنونه كده انا ما باحبهاش .. بس انتي برده مهما كان واحده من عيلتنا ولازم ما ياخذش اي حد من بره ..

اسما : ربنا يخليكي ليا يا طنط عاليا يا رب في الوقت ده

اسما حضنت عاليا و فريده دخلت عليهم استغربت جدا من علاقتهم القريبه اليومين دول ببعض وبقت واثقه انهم بيخططوا لحاجه سوا ..