في قلوب العاش*ين

في قلوب العاش*ين البارت الخامس من الجزء الثاني

فارس فتح عليهم الباب وقال لهم : انتم قاعدين هنا وسايبين الناس اللي جايه تعزي و بتتكلموا في ايه .. فريده فضلت ساكته .. وحور قالت له : ابدا دخلت فريده اقعد معاها شويه عشان كانت وحشاني .. بقى لي كثير قوي ما شوفتهاش ..

فارس : طيب اخرجوا بره دلوقت .. مش وقته ..

خرجت حور وفريده بره كانوا في ناس كثير واقفين بيعزووهم .. خلصوا العزاء وفريده سلمت على حور ومامتها وقالت لها : انا هاروح بقى يا حور عشان الوقت اتاخر و هابقى اجي اقعد معكم ثاني .. شدو حيلكم وربنا يرحمه ويغفر له ..

حور : شكرا لك يا فريده طول عمرك صاحبه واجب .. فريده : يلا يا فارس عشان نروح ..فارس سلم على حور ومامتها واخواتها وقال لحور : هابقى اجي لك بكره الصبح .. فريده اخذت فارس وركبوا العربيه روحوا على البيت وهما في الطريق فارس قال لها : هي حور اتكلمت معك في حاجه يا فريده ..

فريده : لا ابدا ليه بتقول كده ..

فارس : اصلها اخذتك جوه لوحدك قلت اكيد في حاجه يعني انتي هتخبي عليا ..

فريده : بصراحه يا فارس حور حاسه ان ماما مش موافقه والموضوع ده مسبب لها ازمه كبيره ..

فارس : بس انا قايل لها ان ماما موافقه اوعي تكوني رحتي قلت لها اي حاجه ..

فريده : انا ما اتكلمتش خالص ولا رديت اصلا بس البنت حاسه من تصرفات ماما وموضوع ان ماما ما جتش النهارده العزاء ده اكدت لها ان ماما فعلا مش موافقه .. والموضوع ده مضايقها جدا .. احنا لازم نقنع ماما انا وانت بموضوع حور شوف اي حاجه نقولها و اتصرف ..

فارس : والله براحتها لو مش موافقه ومش عاوزه تعرفني ثاني ولا انا ولا حور براحتها ..

فريده : بس حور قالت لي انها عمرها ما هتتجوزك طول ما ماما مش موافقه .. لازم نحاول نكلم ماما يا فارس ..

فارس : والله انا تعبت من ماما ومن تصرفاتها و شغل العيال ده ..

فريده : خلاص احنا نروح نتكلم مع بابا وهو يحاول يقنعها ...

فارس : هو بابا ما جاش ليه النهارده هو كمان ..

فريده : اكيد خائف على زعل ماما قال يعني كلنا هنسيبها ونمشي من البيت نروح العزاء وهي هتفضل قاعده لوحدها .. على العموم احنا نروح دلوقتي ونتكلم معهم ونشوف هم هيعملوا ايه .. وصلوا فريده وفارس على البيت لقوا مامتهم وباباهم قاعدين عمالين يتكلموا عاليه : حمد لله على السلامه ما لسه بدري كل ده كنتم بتعزوا ..

فريده : ايوه العزاء لسه خالص من شويه مش معقول يعني هنسيب الناس في نصف العزاء عشان نروح ..

عاليه : ايوه طبعا يا فريده انت صاحبه واجب سايبه لي ابنك هنا في البيت ورايحه عشان الست حور ما تقولش عليكي حاجه ..

فارس : وهي من امتى حور هتقول عليها حاجه يعني .. عاليا : وانت بقى المحامي بتاعها يا استاذ فارس .. اسمع بقى يا فارس الجوازه دي انا مش موافقه عليها ولو حصلت هيبقى على جثتي ..

فارس : للدرجه دي يا ماما انتي كرهاها .. هي عملت فيك ايه وحش عشان تتكلمي عليها بالاسلوب ده .. حور دي ما فيش زيها واحسن واحده قابلتها في حياتي وانا هتجوزها يا ماما ولو عاوزه تقاطعيني وما تعرفنيش ثاني فدي حاجه ترجع لك .. انا بقى مش هاسيب حور عشان خاطر العادات والتقاليد بتاعتكم ومش هتتجوز واحده من العيله هي دي اللي قلبي اختارها ولو اي احد من الناس عاوز يتكلم يتكلم انا مش فارق معي كلام الناس .. وانت عارفه كده كويس .. ما تتكلم يا بابا ولا تقول حاجه ..

بابا فارس : هاقول ايه بس يا ابني امك بتتكلم كلام صح وانت كمان كلامك مش غلط بس هنعمل ايه فعلا الناس هتتكلم علينا ومش هيبطلوا كلام مهما عملنا .. فارس : بس انا بقى هامشي بدماغي و هاعمل ايه اللي يريحني ومش هتجوز احد غير حور .. شوفي يا ماما انت عاوزه تخسريني عشان خاطر انا باحب واحده وعاوز اتجوزها .. انتي جدتي ارغمتك انك تتجوزي بابا ولا انت اللي كنت بتحبيه وعاوزه تتجوزيه ..

عاليه : اتجوزت واحد في نفس مستوايا ولا اقل مني ولا اعلى منى احنا الاثنين زي بعض بالضبط هو ده الصح اللي المفروض كل الناس تعمله مش تروح تبص لواحد مش زيها ..

فارس : انت برده يا ماما مش مقتنعه ان حور ما بصتليش ولا اي حاجه من الكلام ده انا اللي صارحتها اني باحبها وهي عمرها ما لمحت لي حتى انها بتحبني .. وبعدين انت شايفه الظروف اللي هي فيها دلوقت على الاقل المفروض تكلميها و تعزيها في وفاه باباها مش تفضلي تقولي الكلام ده ..

عاليا : انا فعلا مش هخسرك يا فارس لان انت ابني الوحيد ومش هاسيب واحده زي دي تاخدك مني لكن انا عندي شرط وانت عارفه كويس ... البنت دي لازم تيجي تقعد معنا شهر قبل الخطوبه وساعتها بقى احدد لو كانت تنفع لك ولا لا و على الاقل تتعلم عادتنا وتقاليدنا عشان الناس ما تاكلش وشنا اظن كلامي ده ميزعلكش لازم تروح تتكلم معها في الموضوع ده وهي دلوقت باباها اتوفى .. يعني مش هيبقى في راجل غريب في البيت احنا برده ناس بتفهم في الاصول وهي لو عاوزه تجيب مامتها واخواتها الصغيرين معها يبقى احسن برده عشان يتعلمو هم كمان يتعاملوا مع الناس اللي بيجولنا احنا مش عاوزين فضائح قدام الضيوف ..

فارس : هابقى اقول لها بس اكيد مش دلوقت لان دلوقت هم في صدمه موت باباها ومش هينفع افتح معاها موضوع زي ده ..

عاليا : خذ وقتك يا فارس بس انا عاوزاك تعرف اني مش هيحصل اي خطوه رسميه في الموضوع بتاع خطوبتك انت وحور ده غير لما تيجي تقعد هنا وتتعلم العادات والتقاليد بتاعتنا وساعتها بقى انا هابقى احدد لو كان حور تنفع لك ولا لا .. فارس سابها وطلع على فوق هو وفريده .. وعاليه وجوزها قعدوا يتكلموا جوزها قال لها : انتي طيبه يا عاليا واكيد هتوافقي عليها ..

عاليه : انت مجنون انت كمان انا باقول له كده وخلاص عشان اجيبها هنا و اوريها المعامله اللي هتتعاملها لما تتجوز فارس وتسيبه هي من نفسك انا هطفشها بطريقتي يا عمار ..

عمار : حرام عليكي يا عاليا كده هت**ري بخاطر ابنك لو انت مش موافقه من الاول قولي له ما اتعشمعهوش به حاجه بس كده كده فارس اصلا مش هياخد برايك و هيعمل اللي في دماغه في الاخر ..

عاليا : طيب لما نشوف يانا يا اللي اسمها حور دي انا مش هسيبها تاخذ ابني مني بسهوله كده وها خليها هي اللي تقول له مش عاوزين نكمل مع بعض .. فارس طلع الاوضه بتاعته كان بيفكر في كلام مامته وعارف كويس ان الموضوع بتاعه هو و حور مش سهل خالص ومستحيل مامته تعدي الموضوع كده بسهوله وقال انه لازم يعافر عشان يوصل ل حور .. مسك تليفونه واتصل بحور كان حالتهم صعبه جدا هي واهلها ..

حور : ازيك يا فارس وصلت بالسلامه انت وفريده .. فارس : ايوه يا حور الحمد لله طمنيني عليك انت ومامتك واخواتك ..

حور : حالتنا صعبه قوي يا فارس مش قادره اوصف لك البيت عامل ازاي من غير بابا هو كان على طول نائم وتعبان بس البيت وحش جدا من غيره دلوقت ربنا ما يكتب اللي احنا فيه ده على احد خالص .. انا لازم انزل الشغل من بكره عشان خاطر ايجار البيت في ميتراكمش علينا ..

فارس : ما انا قلت لك لو محتاجه اي فلوس انا هاديها لك .. الفلوس كثير الحمد لله بس انت ما تتعبيش نفسك وتعملي حاجه فوق طاقتك ..

حور : ما ينفعش يا فارس انك تصرف على واحنا لسه ما اتجوزناش ما فيش حد هيوافق بالكلام ده .. ولا انا كمان .. ما تزعلش مني يا فارس بس انا ما تعودتش اخذ فلوس ما تعبتش فيها وبعدين انا اتكلمت مع ديما النهارده في العزاء وقلت لها انها تقول للاستاذ عا** اني هارجع الشغل من بكره .. هي قالت لي خليك في البيت ريحي شويه لكن انا رفضت لان البيت واخواتي محتاجين لفلوس ..

فارس : انتي احسن واحده شوفتها في حياتي يا حور مكافحه وبتخافي على اخواتك واهلك وفي نفس الوقت ما بتمديش ايدك ولا تاخذي حاجه من احد انت ازاي عندك الصبر ده كله علي الحياه اللي انت فيها .. انتي بتديني درس كبير جدا في الصبر والتحمل ناس كثير جدا مش في نصف ظروفك ومش بيعرفوا يعملوا اللي انت بتعمليه .. انا كل يوم ببقى مبسوط انك الانسانه اللي انا اخترتها بجد ..

حور : بس حاسه ان انا وانت يا فارس علاقتنا دي مش هتدوم جاي لي احساس بكده .. و احساسي عمره ما خيبني ..

فارس : ليه بتقولي كده يا حور انا مستحيل اقدر اعيش من غيرك ولو كل الدنيا وقفت قدام علاقتنا انا ابيع الدنيا كلها عشانك ..

حور : بجد يا فارس يعني لو مامتك ضغطت عليك مش هتسبني ..

فارس : لا طبعا مش هاسيبك وبعدين ماما ملهاش دعوه انا اللي هتجوز وانا اللي هاكمل حياتي معك هي ملهاش دعوه بك .. لو هي مش متقبله الموضوع ممكن بكل سهوله انا هاخذ شقه بعيد عنها بس هي كده كده لازم تتقبل غصب عنها لانها مش هتقدر تخليني ابعد عنها ..

حور : بس انا مش عاوزه كده يا فارس انا نفسي تكون حماتي فرحانه بي و موافقه على الجوازه من اولها مش عاوزه احسسها اني اخدتك منها .. وهم بيتكلموا فارس سمع فريده بتنادي عليه وتقول له تعالى يا فارس انا عاوزاك

يتبع