ELLYSE MARIE ROMANO-DEL PIERRO
“Oh? Bakit nandito si cutie patootie?” tanong ko kay Alona pagkapasok ko ng bahay namin. Pinuntahan ko siya dito dahil wala lang, gusto ko lang makigulo. Day-off kasi ni Alona ngayon kaya wala siya sa flower shop.
Nilapitan ko agad si Michael, ang napaka-cute na bata na nakaupo sa sahig at nilalaro ang toy car nito. Ang cute-cute niya dahil ang taba-taba ng pisngi.
Tiningnan ako ni Alona. “Nandito ka pala,” aniya.
“Hindi wala-wala, anino ko lang ito,” pambabasag ko sa kanya saka tumawa ako.
Ibinalik ni Alona ang tingin niya sa binabasa niya at hindi pinansin ang sinabi ko. Abalang-abala naman siya sa kung anong binabasa habang nakaupo ng prenteng-prente sa mahabang sofa. “Iniwan sa akin ‘yan ni Aling Norma. Wala kasing mag-aalaga sa kanya,” sagot niya
