الجزء الخامس
2286 Words
يوميات الكورونا
البارت الخامس
توقفنا ان الجد نبيل عمل استعداء للولاد والبنات احفاده كلهم بل طلع شققهم وصحى من كان نائماً .
وايضا شاهدنا وصول الدكتور عمر من المستشفي وهو في غايه القلق علي عائلته وقرر انه يستقر في الملحق المبني في الجنينة وهاله كانت بتحاول تغير رائيه واعتذر منها و
عمر دخل ملحق الفيلا وقفل علي نفسه هاله بتخبط عليه .
هاله :افتح يا عمر احنا مع بعض علي طول متجننيشً.
عمر :هاله اعقلي كده المصلحه هي بتقول كده اعقلي وإلا …..فكر ثواني بقولك رتبي شنطه انا هروح اقعد في المستشفي ؟
هاله :لأ يا عمر .
عمر :يبقي كفايه انك شايفاني ،ومش عايز دوشه ،وانا مش هكون السبب اني ادخل الفيرس ده البيت .
هاله :بعياط ،طيب يا عمر علشان خطري افتح والدموع مغرقه وشها .
عمر من ورا الباب :هاله عايزك شجاعه دايما وقويه الولاد محتاجينك خصوصا مي مش عايز تحس اني بعيد ومحمد عينك عليه اوعي يا هاله يحسوا باي اختلاف انا معاكوا وكويس الحمد لله بس انا كده بعمل لصالحكوا .
هنا عمر كان واقف ويلمس الباب وكأنه بيلمسها قلبه بيتقطع لكن لازم قوي
هاله بتمسح دموعها :حاضر ياعمر حاضر .
عمر :شوفي كنتي هتعملي ايه روحي اعمليها وانا هاخد شاور وانام وكان بيتكلم بجديه علشان يبعدها عن الباب لانه مش هيقدر يسمعها وهي بتبكي اكثر من كده .
هاله :حاضر يا حبيبي .،بس انا مش موافقه على الي بتعمله اكيد في حل غير انك تبعد عننا هو كل الدكاتره بتعمل زيك لا يمكن شوف هسيبك برحتك بس افتكر الكلام ده مؤقتا .
عمر دخل وضع كل حاجه علي ترابيزه السفره وراح قعد علي الكنبه وهو في غايه الحزن والتعب وفكر ان ده مش حل ….غير هدومه واخد شاور وبيفكر وهو قاعد عينه راحت في النوم.
علي السلم
ادم نازل لجده وقابل هادي علي السلم
هادي : اهلا نجم الجيل تعرف جدك عايزنا ليه ؟
ادم :وانا هعرف منين ،اكيد هيشغلنا في الفاعل .
ادم :بس جدك دخل صحاني كوبايه تلج دلقها. عليا . كنافه ..
هادي :ههههههه الحمد لله طلع كنت صاحي .
ادم :جدك ده فظيع وحطنا في دماغه والحبس ده جه علي هواه .
هادي :شكلها كده .
البنات نازله .
هدير :انتوا واقفين كده ليه ؟
هادي :نازلين مش واقفين .
دليله :طيب اوعي من السكه جدو عايزنا تحت .
هادي :اوبا جدو عايزكوا كمان معانا دليله :داحنا هيتلعب بينا الكنافه با ابني .
ادم :بدل البنات في نفس العمليه يبقى شغل خفافي اطمن يا هادي.
هادي :اما اشوف واسمع بنفسي اطمن جدك ده دماغ ممكن يشغل البنات عادي في حمل الاثقال ويقول تربيه جسديه .
دليله :حطت ايدها علي دماغها وكأنها بتفكر ،وتفتكر احنا نعمل ايه يا كابتن ؟
هدير :هههه الجري نص الجدعنه بس جدوا ميعملش فينا كده ابداً.
ادم :وانا بقول كده .
نبيل بصوت عالي من تحت في الجنينه
نبيل : يلا انا هعقد مستنيكوا كتير ..
الولاد والبنات نازلين جري .
ومي ومحمد لحقوا الشباب
المشهد في الجنينه نبيل قاعد علي الكرسي الكبير وعامل قاعده كلها كنب وكراسي تكفي الاحفاد هذه القاعده الي رتبها ادم وهادي في سغل اليوم السابق ،وبيشاور ليهم .
نبيل :شايفين الباسكت الي على جنب هناك ده كل واحد وواحده يحط موبيله هناك .
ادم :ليه يا جدو ما ينفعش ؟.
دليله :انا اصلا بشيت مع اصحابي وكمان ساعه عندي محاضره اون لاين يعني محتاجه الموبيل .
هادي :افهم انت بتحاول تضايقنا ليه ؟
مي :احنا هنسيبه بس قول السبب .؟
هدير :يا جدو احنا ما ينفعش نسيبه .
نبيل :خلصتوا كلام ، روحوا حطوا الموبيلات الاول وتعالوا اقعدوا وانا هشرح ليكم .
الاحفاد نفذوا كلام جدهم بضيقه ورجعوا اماكنهم وجلسوا بجانب نبيل .
نبيل :الاول كل واحد اكيد عنده لاب توب يحضر المحاضره منها .وانا مش بضايقكوا يا هادي اكيد .
وبالنسبه ليه يا مي ،هقول لكم كل واحد و واحده فيكم بتبقي قاعده بتشيت وتكلم اصحابها الي مش موجودين جنبها ،طيب ما تكلموا بعض مش احسن نكلم الشخص الي قاعد قدمنا ….انتوا اخوات ولاد عم ولاد خاله فين التاريخ المشترك بينكم ،قاعدين مع بعض ومش قاعدين ، الحياه الي انتوا عايشنها مش حياه ديه حياه افتراضيه ناس مش موجودين بتكلموهم ليه كلموا بعض … قرار كل يوم لما تيجوا عندي واحنا مع بعض نبقي مع بعض بالجسم وال*قل مش معانا .
جسمك معانا وعقلك في حته تانيه مرفوض مرفوض الكلام ده من غير زعل فاهمين .
النهارده هنبتدي ،وكل واحد وواحده تكتبلي محاضرتها امتي .
هادي :جدو انت هتعمل جدول لينا ؟
نبيل :اكتب يا هادي محاضراتك امتى .
كل ولد وبنت كتبت ميعاد المحاضرات وادوا لجدهم الورق وقاعدين ساكتين **ت وزعل مش حابين تحكم جدهم ،وهو لاحظ .
نبيل :ايه ساكتين ليه ؟
دليله :هنقول ايه يا جدو .
مي :مفيش موضوع محدد نتكلم فيه .
نبيل :همممم حتي مش عارفين تتكلموا مع بعض طيب نتكلم في موضوع شاغل البلد اعرف رأيكم فيه .
هادي :موضوع ايه يا جدو العزيز .
نبيل :اتريق يا ولد .رايكم في الكورونا وحبستها ليكم .
هدير :ديه خانقه يا جدو جدا .
نبيل :طيب ما ناخد الجانب الكويس .
مي :هو في جانب كويس في الي بيحصل ده .
نبيل :ايوه يا مي بصوا كده انتوا مع بعض وفي بيت واحد ،في غيركم قاعدين مع بعض عائله صغيره اب وام واخوات بس .
احنا عندنا جنينه نقدر نقعد فيها .
دليله :الخروج مختلف اه طبعا الحمد لله اننا مع بعض كلنا يعني مش متصوره اني اقعد انا وادم وديما بس داحنا كنا قاتلنا بعضنا .
ادم :اكيد كنت هتخلص منكم وهرميكم من البلكونه .
هدير :لا انا بحب اقعد مع هادي ،بس مش وقت طويل يعني ،ومش هتوصل للقتل .
هادي :اختي حبيبتي .
مي :وانا كنت هبقي لوحدي خالص محمد ثانويه عامه مش بيخرج من الاوضه .
نبيل :يبقي نحمد ربنا .
الكل :الحمد لله .
نبيل :وفي سبب علمي ان الفيرس ده جعل الكره الارضيه تتنفس لان الموصلات قلت والمصانع مقفوله فقلل ثاني اكيد الكربون .
هادي :كلام علمي جدا .
ادم :كلامك صح يا جدو انا لسه قارئ بوست ان توقف الطيران ساعد ان قلل فتحه الاوزون وكمان توقف السفن ساعد على تقليل الثلوث في المحيطات والبحار بنسبه كبيره.
دليله :واحنا مالنا ومال التلوث يعني احنا الي عملنا التلوث ده .
نبيل : اهو ده اسمه انانيه كل البشر على الارض مسئوله يا دولي انا بقول ديه مسئوليه عامه بصوا احنا ندخل المكتبه تنظفوها الاول وتقروا عن التلوث في الارض انا عندي كتب كتير بتتكلم عن الموضوع ده وبالمره تعملوا فهرس للكتب الموجوده علشان لو حد احتاج كتاب وانا عندي استعداد الي عايز كتاب يقراه ياخده بس شرط يرجعه ويقولنا ،هو استفاد ايه .
ادم :نقرا ايه يا جدو ،كنا قرأنا كتب الدراسه.
هادي :اخر مره مسكت كتاب ،ايام ثانويه عامه دلوقتي ملازم بس .
نبيل :طيب الي هيقرا كتاب ويفهمنا الي فيه ليه عندي ٢٠٠٠جنيه .
هادي :طيب ما انا ممكن اقولك اني قرتيه ،وانا ما قرتهوش .
نبيل :كل كتب المكتبه انا قرتها ،هناقشك فيه ،وسعاتها يا بيه هعرف قرات ولا بنستعبط .
ادم :مش سهل انت يا جدو .
نبيل بضحك :لان مبروم علي مبروم ما يرولش انا كنت شاب وفاهم تفكيركم او اقول اني بحاول افهمكم بس ممكن انت تساعدوني افهم الجيل الجديد .
مي :انت مفيش منك يا احلى جدو .
نبيل :طيب نسيب شغل المكتبه ليوم تاني تيجوا نلعب مع بعض .
نبيل فكر انه يقرب من احفاده تفكيرهم كله لعب وهزار يدخل من المدخل ده وبعد كده واحده واحده يبين مسئوليتهم ،لكن طريقه يوم امس كانت غلط وانه يقول انهم يقروا مش هيقروا غصب وبدل ما يقربهم ممكن يبعدوا .
هدير :ايوه نلعب بس نلعب ايه ؟
نبيل ببتسامه انه قرب من عقلهم :طيب انا معايا كوتشنه كلنا هنلعب شيتنج ،مين موافق .
الولاد كلهم احنا .
نبيل قرر ان اليوم ترفيهي ايضا علشان الاحفاد متزهقش من الحبس وايام الحظر تعدي ،و الولاد يروحوا ويحضروا المحاضرات ويرجعوا لان القعده هتبقى ظريفه هذا ما يتمناه نبيل .
كان وقت جميل الكل بيضحك جو عائلي جامد وسناء ولبنه وميار وهاله عملوا الاكل ومحمد وديما خلصوا مذاكره ونزلوا قاعدوا معاهم ،وبعد كده شغلوا مسرحيه كوميدي ،وكان الوقت بيعدي ،والكل مبسوط وفعلا محدش فكر يمسك الموبيل لان في بديل التواصل الفعلي بين البشر .
بعد فتره طلع البنات في شقه مهند وادم وهادي طلعوا يلعبوا بلاي سيتشن
في الروف
هادي :والله الوقت عدى حلو في حاجات جدو بيعملها الواحد مش بيفهم هو بيعملها ليه لكن بعد شويه بيفهم .
ادم :فهمت ايه يا فيلسوف ؟
هادي :علشان انت غ*ي العائله لمتنا يا ادم احنا كلنا قاعدتنا مع بعض حلوه ربنا ما ينقصنا ودايما نبقى مع بعض .
ادم ؛انت رومانسي يا هادي الليله ديه انا نازل .
هادي بضحك :تلاقي المزه مطرقعه ليك فعايز تنزل بسرعه تكلمها .
ادم :مين بيطرقع لمين انا يا ابني ادم الصفواني ويتسمع كلامي .
هادي وقف :بس خلي بالك اميره مش زينا تربيتها مختلفه منفتحه طريقه كلامها لبسها مش احنا خالص لو معرفتش تغيرها هتتعب .
ادم :انا مسيطر يا ابني وهتشوف .
هادي :افلح ان صدق،يعني انت بتحبها ولا لسه ؟
ادم :مبسوط اني معاها لكن لسه موصلناش لدرجه الحب الي فيها مقدرش استغنى .
هادي :المهم ما تلعبش بعواطف حد احنا عندنا بنات اوعى يا ادم .
ادم :لا طبعا في حدود انا حاطتها لنفسي مع اي بنت انا علاقتي كتير بس اسال اي بنت من ال كنت بعرفهم هيقولوا لك اني عمري ما تعديت حدودي معاهم.
هادي :طيب الحمد لله .
ادم :انا نازل…
ادم وهو نازل كان بيفكر في اميره وطريقه كلامها ولبسها وانها جريئه معاه وانه هو الي حاطت الحدود وهي بتقول عليه مقفل ، دخل الشقه سمع صوت اغاني وضحك في اوضه البنات ضحك على ضحكهم ودخل اوضته ومسك موبايله .
في غرفه البنات هدير ودليله بيحاولوا يغيروا مود مي من خوفها على باباها دخلوا شغلوا اغاني كلها رقص.
دليله :ايه يا ستي مش عجبك كل الهرج والمرج الي عملته ولا الي جدو عمله في اللعب .
هدير :بس جدو فظيع كداب كدب ده حط فوق عشرين سبعه واول ما اقول شيتنج القي اخر مجموعه صح .
مي بضحك اخيرا .:ولا خالو ماجد الي لبس الورق كله .
هدير :اخيرا ضحكت .
دليله عملت نفس كبير كانها ارتاحت .
ديه العائله السند الحب بدون مقابل
مي :ربنا يخليكوا ليه عمري ما حسيت اني بنت وحيده وعمركم سبتوني زعلانه .
هدير :انا دايما بقول اني عندي ثلاث اخوات بنات وانت هبله نسيبك ازاي .
مي :فعلا احنا اخوات عمري ما اتخيل اني ممكن اقعد بعيد عن البيت ده .
دليله بتقعد مربعه :عارفين يا بنات نفسي جدو يبني شقق لينا هنا ونتجوز هنا .
هدير :يا سلام يعني العريس ياخد عروسه وشقه اوفر عليها انت هبله يا بنتي .؟
دليله :ليه ما عمو عمر قاعد هنا في بيت جدو بابا مراته !
مي :ايوه صح بس احنا عندنا شقه باسم بابا في التجمع اتجوز هناك ونقلوا اما ماما قالت له وهو وافق علشان كنت صغيره وهو كان بينام في المستشفى كتير ويسيب ماما فكان احسن انه يسيبها مع جدو وناناه علشان عينهم تبقى علينا .
دليله :خلاص العريس يجيب الشقه وبعد كده نرجع هنا .
هدير :بس ايه بقه فين العريس ده ؟انت خلاص قربتي تخلصي ومفيش واحد عجب سمو الاميره ،رغم كم المعجبين .
دليله : مش حاسه ولا واحد من المعجبين دول تحسي انهم اطفال مش رجاله يعتمد عليهم .
مي : انت قافله اصلا يا دولي .
دليله :تعتقدي ..ان يكون في واحد شدني واقفل ولا واحد يا مي حسيت اني انخ*فت اما شوفته ،ممكن اعجب بالشكل زي ما انت تعجبي بمغني او ممثل شكله حلو لكن بعد ما اتكلم معاه بيكون فاضي من جوه عيل فاهمتني؟
مي : انا عن نفسي فارس احلامي زي جدو بتشوفوا بيعامل ناناه ازاي انا عايزه الحب ده .
هدير :صعب نلاقي حد زي جدو ،ممكن شكل لكن طبع صعب .
دليله :صح ما هو ادم اكتر شبه لجدو بس طباعه غير خالص …بس تخيلي انا عرفت يا دودو انت ليه بتحبي ادم علشان شبه جدو .!
هدير :يمكن فعلا شبهه بس ممكن يكون وهم وسكتت …والبنات كملوا هزار وضحك .
في الروف هادي ماسك اثقال وبيلعب طلع محمد كمان عنده .
هادي :اهلا يا دكتور ،طالع ليه ؟
محمد :عايز افضي دماغي شويه قلت اقعد اجري شويه علي المشايه .
هادي :شيل شويه اوزان خلي العضلات تطلع قبل الجامعه اعمل فورمه الجامعه .
محمد :واعمل فورمه ليه وهو شايل خمسه كيلو في كل ايد وهو بيرد علي هادي وسرحان دماغه مع باباه وقلقه عليه .
هادي بيقرب منه وهو لابس تي شرت حمالات وباين عضلاته وبيشاور على العضله وهو بيخرجه بطريقته من قلقه .
هادي :الفورمه للثقه انك تقدر تدافع عن نفسك وعلشان تلاقي عين البنات ملاحقك .
محمد :عين البنات انت قولي كده ،انا بعمل لصحتي ومش لاي حاجه تانيه .
هادي : وماله صحتك عامل جذب وحط ايده على كتفه بس قولي يا دكتور بضحك الخمسه كيلو الي انت شايلهم يبقوا كياس فاكهه جدك بيشيل بيد واحده دول ومش عايز اتكلم عن نفسي .
محمد :على قدي يا كابتن هادي .
هادي :نمشيها بدايه كويسه ،وانا معاك لغايه ما تاخد ميداليه أولمبيه .
محمد :ههههههه ماشي يا كوتش ،فين ادم بتدرب لوحدك ليه ؟
هادي :تعب ونزل خلينا نكمل وبدأ يشرح لمحمد فهو اخوه الصغير و بيحبه جدا وعارف قلقه على باباه .
الجد نبيل نزل قاعد بيحاول يوصل لتفكير احفاده علشان يقدر يصاحبهم اكتر وبعرف مشاكل كل واحد منهم ، وبيقرب منهم لان العائله بتقف بجانب بعضها بدون انتظار الفائده او ده المفروض والي بيحاول الجد نبيل يزرعه في نفوس احفاده زي ما بيزرع الزرع في جننته لكن زرع النفوس اصعب بكتير .
اقتباس من البارت القادم
نبيل خبطها علي دماغها :ادخلي عندي واغسلي وشك واعرفي ان جدو حافظ لسرك .
مشيت هدير لجوه الفيلا وملامح نبيل اتغيرت بضيقه وبيكلم نفسه ،والله يا ادم لخليك تزحف وراها .
قاعد تلف من بنت لبنت ومش شايف البسكوته الي في بيتك صحيح اعمي .
خرجت هدير من شقه جدها وراحت باست خده .
هدير :على فكره انت احلي جد في الدنيا .
نبيل :وانت ارق واجمل حفيده يادودو .
هدير :طبعا مش أوصيك يا جدو .
نبيل :سرك في بير يا حبيبي .
هدير :وانا هعمل ايه يا جدو ؟
يا تري نبيل هيعمل ايه لهدير ويعمل ايه في ادم ؟
ننتظر البارت القادم .
- Writer
