Ang Plaza Libertad

Sa Calle Real ... Dapit-hapon na ng mga oras na iyon nang mapadpad sa isang maliit na pasyalan si Aling Gabriela at ang kanyang kambal na anak na sina Julio at Julia. Napagpasiyahan nilang magpahinga muna roon sandali dahil naglakad lang sila mula Kalye Lapaz papuntang Calle Real. Naisipan niya munang bumili ng maiinom para sa kanya at mga anak kaya iniwan niya ang kambal doon sa plaza. Binilinan naman ni Aling Gabriela si Julia na bantayan ang kanyang kapatid na si Julio. Ihing-ihi naman nang mga oras na iyon si Julio nang magpaalam siya kay Julia. At dahil walang palikuran ay sa likod ng isang punong nasa gitna ng plaza siya umihi. Hindi pa man siya nakakalahati ng pag-ihi ay naramdaman niyang parang pinapaypayan siya ng mga sanga ng puno. Napatingin siya sa itaas at nanlaki ang mga mata sa nakita. Biglang sumigaw ng pagkalakas-lakas si Julio dahilan para lumingon ang kanyang kambal. Kitang-kita ni Julia ang unti-unting paglamon ng isang puno sa kanyang kapatid. Nawalan ng lakas si Julia upang takbuhin at tulungan ang kapatid. Ayaw kumilos ng kanyang mga paa at magsalita ng kaniyang bibig. Nakatayo lang siya. Hindi makahakbang habang pinagmamasdan ang kapatid na si Julio na sumisigaw at unti-unting nilalamon ng malaking punong iyon. Ate Julia! Ate! ...... Dating Calle Real ngayon J.M Basa Street... "Mommy! Help!" Ang sigaw ng anak ni Julia. "Julius? ANAK! Ibalik mo sa akin ang anak ko." Halos magdurugo ang kamao ni Julia sa kakasuntok sa puno ng mangyari ulit ang kagulat-gulat na misteryo labinlimang-taon ang nakalipas. At ang biktima - si Julius. Ang kaisa-isa niyang anak. Hindi niya alam kung paanong biglang nawala sa kanyang paningin ang isang malaking bungangang lumamon sa kanyang anak ngayon pati na rin sa kanyang nakababatang kapatid noon. Kaya't ganun na lamang ang kanyang pagkasabik na matuklasan at tapusin ang ano mang misteryo at sino mang taong kumuha sa kanyang anak. Sundan si Julia at tuklasin ang misteryong nakabalot sa Plaza Libertad. Mailigtas kaya niya ng buhay ang kanyang walong taong gulang na anak na lalaking si Julius?