NASA circular driveway ng mansion si Daxton, hinihintay ang kanyang sasakyan na pinakuha niya sa isang staff nang may biglang pumasok na itim na sasakyan sa gate. Hindi iyon pamilyar sa kanya.
Dumiretso iyon papunta sa pabilog na driveway at huminto malapit sa kanya.
Nang lumabas ang driver ng sasakyan ay mas lalong nagsalubong ang mga kilay ni Daxton.
Hindi niya iyon kilala. Ngayon lamang niya nakita ang lalaking iyon na nakasuot ng dark sunglasses at itim na polo shirt and pants.
Matangkad ang lalaki at may matipuno na pangangatawan. For one split second, naisip niyang baka may bagong ipinalit na nobyo si Octavia pero agad din niyang inalis iyon sa isipan dahil alam niyang hanggang ngayon ay baliw sa kanya ang babae kahit pa nagalit ito sa pagkawala ng deal with Mr. Hernandez.
