لم تكن خطيئتنا

#لم تكن خطيئتنا نورا ناصر من سنتين تركت وظيفتي .. كشرطي مرور .. واتخذت من السيارة هذه مص*ر رزقي .. امتهنت مهنة سايق ت**ي .. يمكن جانت ساعة عصبيه لا بل من الممكن ان اعتبرها لحظة غباء وض*ب من الجنون والانتقام من نفسي قبل اي شخص ثاني صح شغل المرور متعب بس على الاقل .. راتب نهاية كل شهر وعندي عطلة بالاسبوع .. ع** عمل الت**ي المتعب والكعدة على الكشن لساعات طويلة وتصليحات السيارة المكلفة والمتعبة والمزعجة لمن فكرت اترك وظيفتي جنت ..اخاف اموت وأماليد تاخذ راتبي مااريدها تتمتع بي من بعدي .. مااريد هالشي يصير. وحتى حصتي من البيت راح اتنازل عنها لامي خاف تحظى بيهاا .. امي ماتظلم بناتي ابد .. اعرفها مريه طيبة وجريمة وتوكف بسدهن واني اتجول بشوارع البصرة .. بحثا عن الرزق ولكمة الحلال. الوكت الظهر والجو حار .. والتبريد عطلان ماادري شبي مفكر اخذ السياره للصناعيه. يشوفون مشكلته شنو ووين الخلل حتى لو يكفيني بس هالجم شهر هذا الي بقن من الصيف .. احنه بالعراق من يجي الصيف نريده بس يخلص على كد حرارة الجو الملتهبة عبالك عدنه حرب ونريدها تخلص نتمناه ينكلع ويجي الشتى ونرتاح من الحر ... والمصيبة الكهرباء تتخبل بالصيف تكوم تنطفي ازود من الشته ...هاي هم مشكلة عويصة ومالها حل لازم اصلح التبريد .. مو الي انه اتحمل كل شي بس الزباين مايتحملون ومايركبون بسيارة مابيها تبريد يعني انه علمودهم ركنتها على صفحه .. سحبت الخاولي الي نشف من الحر .. نزلت من السياره .. وبيدي الخاولي .. وصلت للصندوق مال السياره طلعت منه ترمز الماي .. وسديته .. خليته على مؤخرة السياره وفتحت الماي وبديت ابلل الخاولي بالماي البارد .. الي سوته الي رقيه .. ابلله واتذكرها كل يوم قبل لااطلع للشغل بالسياره من الصبح ..اشوفها كبالي وابتسامة بريئة مرسومة على وجهها الحنون والبريء .. وبيدها الترمز تارسته ماي وثلج .. ابوسها على راسهاا واطلع .. تذكرتها وضحكت .. انرسمت كبالي ملامحها وهي مبتسمة .. هسه جاي تجلف وتنظف اعرفها حركة ونظيفة ولو مو حر لازم تنظف وتفرك ماتكعد ساعة زمان ترتاح بيها بللت الخاولي وخلصت ..شربت ماي بارد.. ورجعت الترمز لمكانه .. ورجعت صعدت بالسياره .. خليت الخاولي على راسي حتى احس بالبرودة شويه ولو لفتره قصيره على الاقل ... سقت السياره. .. وظليت ادور على رزقي .. وافكر ببناتي .. اتمنى تجيهن قسمه واطلعهن .. الاثنين الكبار يمشن بس رقيه شلون؟ ومنو يتزوجها؟ .. وهي بهذه حالتهاا.. اله اشوفلي واحد من ولد اخواني لو خواتي .. حتى لو متزوج .. يكولون اخطب لبنتك قبل ابنك .. وانا ماعندي ولد .. اريد ازوجهن واهاجر منا وامي شلون؟ امي ياخذها واحد من اخواني او اختي زين واذا هاجرت وهن ماارتاحن ويا ازواجهن؟ هم البنات للممات ماجذبوا من كالوهااا .. قطع سلسلة افكاري .. وصار كبالي رجال كبير بالعمر لابس دشداشة بيضه وغتره .. اشرلي .. وكفت السياره .. مديت راسي من جامة السياره گتله .. هاا عمي وين توصل؟ ؟ .. كال .. للدير تروح بويه .. فكرت شويه الدير بعيده .. كتله يلا عمي اصعد رزق وجايني .. عود افول بانزين بالطريق صاح مره كبيره كاعده ع الارض وفتح الها الباب بخمول وايد متعبه عليها تجاعيد سنين مرسومه بالم صعدت المريه وهي تتن*د من التعب .. سد الباب وصعد يمي الرجال .. الرجل العجوز التفت عليه وكال بنبرة تعب .. الله بالخير بوية.. أيوب .. الله بالخير عمي حياك .. تريدون ماي خاف عطشانيين ..،؟ الرجال العجوز ؛ .. كلك خير وبركه .. عدنه بطل مي جبير ..خلته النه بنتي كالت تعطشون بالطريق .. أيوب .. على بركة الله توكلنا .. سقت السياره .. عرفت من خلال كلامه انه جاي يزور بنته هنا .. وصلتهم بعد طوول طريق .. وعدت ادراجي رجعت لديرتي. . وصلت لبيتنا .. دخلت السياره بالگراج .. ورحت للبيت .. طبيت من باب المطبخ .. شفت امي كاعده ع الارض .. تشلف رگي وتاكل .. رفعت راسها شاف*ني .. گالت .. هاا ايوب يمه اجيت؟ .. جاوبتها اشاقة وياهه ؛ ها لا يمه بعدني فد شويه .. .. هاا خوش جا لو جيت جيب وياك خضره .. .. هههههه ضحكنا واحد يحشش ع ثاني .. ... هاا يمه الله يساعدك ... ويساعد بختج .. رحت غسلت ايديني بالسنگ .. وكعدت يمها تناوشتلي شلف وظليت اكل .. .. سوده عليه يمه جوعان .. اصيح للبنات يصبلك غدا .. شو ماكو ولا وحده منهن شعجب؟ .. تلاكيهن بالغرفه الفوك .. .. الغرفه الفوك حاره شعجب كاعدات بيها .. .. ماادري ييمه انه من كعدت من النوم هم ماهيست الهن حس انت صيحلهن .. هسه على صوتك يجن صيحت : رقية، رقيه .. امي بضحكه كالتلي .. يلله بلله ماتصيح اله لرقية منين تسمعك مسكينة.. أيوب .. هم صدگتي يمه بس شسوي هالبنيه دوم ل**ني يلهج باسمها .. .. اي ادري بيك تعزها اكثر وحده والله انه هم م**ور گلبي عليها من يوم الصارت لهسه .. .. الله كريم يمه .. اكول صفا وسمية سمعوا صوتي شو مااجن .. ؟ .. يمه خاف نايمات ..؟ .. بهالحر ينامن وهسه الساعه ب4 العصر .. مو من عوايدهن .. اكوم اشوفهن وين .. .. اي يمه كوم .. .كمت و .طلعت من المطبخ وتوجهت للغرفه الجوه ..الي ينامن بيها هن ... فتحتها ماكو احد بيها تصفر .. وكفت وانه مستغرب وين راحن يوميه ماليات البيت .. بصياحهن وعركتهن اسمعها من ادخل السياره للكراج ومن ادخل للبيت يسكتن .. اليوم سنطه. لا حس لا نفس طلعت من الغرفه محتار.. وكفت يم الدرج .. وظليت اصيح صفا سميه وينجن .. ولاجنه اصيح ولااكو صوت الهن .. تن*دت وزاد استغرابي .. الوضع مثير للشك والريبة .. رغم تعبي وشعوري بالاعياء .. شكلت الدشداشه وصعدت فوك .. واني اصيح بأسماء بناتي بعصبية.. صفا، سميه .. وطرررش حتى طرش جاوبن وصلت للغرف الفوك وعددهن ثلالثة .. بس كلهن مو صالحات للعيش .لا اضوية لا كهرباء لا جام . لان هذا بيت العائله وقديم كلش ..وانهجرت الغرف من السنين ومحد كعد بيها وبقت على هذا حالها فتحت الغرف وحده وحده ماكو الهن اي اثر .. زاد استهجاني واستغرابي .. وين راحن ياترى؟ لا أكول وكت مدرسه وراحن للمدرسه .. اشو بعد شهر يلا تخلص العطله الصيفيه .. ولا متعلمات يطلعن يشترن لو يرحن لمكان .. رجعت لأمي .. لگيتها بمكانها بالمطبخ .. بعدهه تاكل رگي ..يابرودج يايمه وانه مشتعل نار باوعتلي كالت ها وينهن ..ماكو مهنه ... .. حتى بالغرفه الفوك؟ ..اي سألتها.. . يمه انت وين جنتي گبل لاتجين للمطبخ ..؟ .. جنت نايمه بالهول .. كعدت وجيت للمطبخ شربت ماي وكعدت اكل .. .. مااشفتيهن طلعن ماحسيتي ماسمعتي شي غريب وانت نايمة؟ .. لايمه والله جنت نايمه .. عصبت كلش ورحت ادور بالحمام ووره البيت ع السطح ماكو فص ملح وذاب .. رجعت يم امي .. شاف*ني كالت .. روح شوفهن خاف يم بيت اخوك المرحوم .. .. هن متعودات يرحن هيج وكت يعني ..؟ .. لا والله يمه حرام ولا يطلعن .. .. عجيييب وين وولن .. بديت اغلي .. اروح واشوف امري لله .. طلعت من البيت طكت الشمس بيه ومنا انه مشتعل شعل ..عائلة بيت اخوي المرحوم بصفنه كلش .. دكيت الباب .بقوة. مره ثنين محد طلع .. دفرته وچفتت بعد مااكعد اتاني يفتحون الباب .. وصلت لنص الحديقه .. انفتحت الباب الرئيسيه وطلع منها اسلام ابن اخوي .. لابس فانيلة تعلاكة بيضه وجاي يلبس بالقميص .. وشعره مبعثر على گصته .. شافني اجه حافي ويمشي سريع .. إسلام .بقلق. ها عمي خير صاير شي .. ؟ ايوب .. البنات عدكم؟ .. يا بنات عمي؟ .. بناتي بعد منو؟ .. ها والله عمي ماادري جنت نايم بالديوانيه هسه ادخل اشوفهن .. .. يلله ولك بالعجل . دخل اسلام وانه بقيت انتظره .. بالطارمه وين راحن؟ ثواني وطلع اسلام .. گال عمي ماكو ولا وحده منهن هنا .. .. لعد وين راحن ..؟عفته واريد اطلع .. صاح عليه وهو يمشي ورااي .. ها عمي وين رايح؟ رايح لبيت عمك سليمان يمكن الاگيهن هناك .. جاي وراك عمي بس اللبس شحاطتي .. انت ابقى يم بيبيتك خاف يرجعن .. طلعنه من بيت اخوي انه واسلام .. شفت امي كاعده بالباب ووجهه كله خوف وترقب .. رفعت راسها باوعتلي .. گالت .. ها يمه وينهن لگيتهن. جاوبتها على وجه السرعة :. ماكو رايح لبيت سليمان ادورهن .. أسلام .. عمي اروح للاسواق اشوفهن خاف رايحات يشترن؟ ام ايوب .. يمه هنه مايطلعن للاسواق .. ولا لبيت سليمان خاف طلعن وضاعن بالمنطقه .. ايوب .. يمه شيضيعن قابل هنه جهال شو التوم عمرهن طك با17 ورقيه 15 سنه سولفيهه للمخبل مو يرحن للمدرسة ويجن شيضيعهن ... _ جااا وين راحن يمه ايووب وين راحن لبنيات يمه سامحني ماكدرت ادير بالي غفيت على روحي ولا حسيت بشي _ هسه مو وكته هذا الحجي يمه انه رايح لبيت سليمان واذا مالكيتهن هناك عود السالفه بيهه إنه .. خليت امي تبجي وتنعي .. واسلام مكرفص يمها ويفرك ب*عره ومبينه الحيره بين ملامحه وهيئته .. تركتهم وطبيت بالفرع الي بصفنه .. امشي واللهث .. احسه صار الطريق طويل كلش اريد بس اوصل وصلت لبيت اخوي سليمان .. دگيت الباب .. طلعت مرته جانت يم الباب .. تغسل الطارمه .. تريد تسلم قاطعتها وبدات طاقة صبري بالنفاذ. بلحظة گتلهاا .. زينب بناتي ماهما عدكم؟ زينب .. لا والله ايوب جا وينهن مو ابيتكم .. ؟ ماجاوبتها عفتها ومشيت وانه عاجز.. قربت اوصل لنهاية الفرع وانا شارد الذهن افكر بهالطركاعة هاي بنات ويختفن من البيت والله مصيبة .. سمعت صوت سليمان وراي يصيح عليه . ايوب، ايوب .. ولك ايوب اوكف مادرت وجهي .. من اليأس ماجاي احس بشي .. وصل يمي لزمني من كتفي. .. دارني اله بايد وحده كال وينهن بناتك وين ولن زينب تكول جاي تدور على بناتك؟صدك جذب ايوب كول انفضحنه بالمنطقة وين ولن ايوب .. بيأس وغضب گتله انه ادري وينهن واجيك عفته ومشيت .. مشي وياي .. اسمعه يكوول .. همزين ماعندي بنات بس هم وشلعان گلب .. مااهتميت لحچيه رغم غثني .. وانه بهذا وضعي ... مشينه وصلنه لبيتنه .. امي كاعده يم الباب وتبجي واسلام مكرفص يمها ومدنگ راسه .. شافنه من بعيد اجه يمنه .. اسلام .. عمي رحت لسوبر ماركت دورتهن ماكو مالكيتهن .. عفته مااهتميت لكلامه ... رحت بسطت يمهم .. اجه سليمان كعد يمي .. الام .. سامحني يمه ايوب ماداريت بالي على بناتك. والله خذتني النومه .. اسلام .. عمي امشي نبلغ الشرطه خاف خ*فوهن .. سليمان .. اي يلله امشينه حتى خوش ننفضح فضيحة .. ايوب .. لالا مايحتاج انه يمكن ادري بيهن وين .. بوسط تساؤلاتهم گمت من يمهم .. وهمَ دخلوا وراي .. طبيت للهول .. طلعت تليفون .. من جيب دشداشتي. دورت رقم جابر خال بناتي وخابرته .. جاوب .. گتله الو جابر شلونك .. .. هلا بيك ابو سمية انت شلونك .. .. اكلك جابر .. بناتي ما هنَ عندكم مااخذتهم بيبيتهم امهم؟ .. لا والله انه هسه ابيتنه ماكو عدنه وأماليد ابيت رجلها .. شعجب وين راحن .. ؟ .. ماادري انه جاي اسألك .. اجيت للبيت مالگيتهن .. .. تدلل هسه أخابر اماليد واستفسر منهاا .... سديته منه وكعدت على الكرويته .. بكل هدوء وتسمر بس بداخلي براكين منفلقه .. لو طلعتها تسع هذا الكون كله .. سليمان .. يااأخي ع البرود العندك لو منك هسه اطلعهن من جوا الكاع واذ*حهن ع القبلة .. الف حمد وشكر اللك ياربي ماانطيتني بنات شكد اكره البنات وخلفتهن .. أيوب .. ماجاوبت سليمان .. سكتت عنه .. ورا دقايق دك تليفوني .. اخذته من ع الطبله .. شفت رقم جابر .. جاوبته .. أكدلي بانه البنات يم امهن وكال اذا تريد هسه اروح اخذهن و اجيبهن الك گتله لا خليهن .. سديته منه .. وكمت ع حيلي .. گتلهم البنات يم امهن رايح انام ..لحد يگعدني .. سليمان / انت صدك تحجي ايوب امشي هسه نجيبهن نسحلهن سحل .. ايوب / لاااء راح يبقن عند امهن گتلك .. إسلام / عمي انت صدك تحجي؟ شون تخليهن عند امهن وهي! !!! أيوب / إسلاااام لحد يتدخل .. عفتهم وصوت سليمان بقى وراي يصيح انت مخبل عاقل تخليهن يم هي الساقطه ولك هذن بناتك هذن عرضك صدك تحجي انت .. أيوب / تظاهرت بالبرود ولا جن اسمعهم .. ورحت دخلت جوه .. ذبيت دشداشتي .. خذيتلي خاولي وطبيت للحمام. سبحت اريد اخمد النار البيه .. سمعتهم واكفين يم الباب مال الحمام. وسليمان يصيح ولك ايوب اذا ماتروح تجيبهن انه اروح بس اطيني العنوان صحت صوت من جوا الحمام زلزلتهم بي .. سكتوا وبعد ماسمعتلهم حس. .. خلصت وطلعت .. وكفت بنص الغرفه جاي انشف شعري .. دخلت امي وعلامات الخوف والتوتر ودموع بعيونها باينه .. وبتوسل باوعتلي وكالت .. يمه ايوب خو ما اخذت على خاطرك مني .. .. لا يمه ماازعل عليج .. .. جا يمه روح جيبهن .. .. لااع خليهن هناك .. .. شنوو؟ متعايز من لگمتهن .. اللهم انطيني الصبر .. .. ايوب يمه انت تعرف كلش زين شكون اريد احجي امهن مره عليها سمعه موزينه وبناتك حديثات مايصير يبقن عدها ورجلها صاحب ميز وبطل وكلها الناس تحجي علي .. .. خليهن هناك انه اريد انطيهن درس يتعلمنه طول عمرهن .. .. ايوب .. يمه درب الجلب ع الگصاب اذا مارجعن وحدهن هذا شاربي ازينه .. بس انت يا يمه ماتسمعين كلام كتلج مااريد تليفون للبيت حتى لا يتواصلن ويه امهن ماتاخذين الحجي .. ..يايمه التليفون اخذته اخابر بي لاشواق اختك اخابرك من تتاخر هم احتاجه. ... يعني اشواق ماتعرف تجي يوميه تسأل عليج شناقصها .. مو مرات تسافر تظل اسبوع اسبوعين تخابرني تسال عني .. .. اي طبعا كاضيتها تفرفر لاظلت تركيا لا ظلت ايران لاظلت تايلند وماليزيا جورجيا واربيل مسويتهن بصره عشار كول فد مره بالجذب كلتلج خل اخذج اعتمري قدمتلج ع الحج لو بس تقشمرج بقطع لقماش وحتى فلوس خياطهن ماتنطيج .. .. يمه تريد احطلك غده .. ؟ .. اي اي ماتقبلين عليها تغيرين الموضوع اذا اكو لگمه حطيله خل اسمم .. .. اسم الله عليك يابعد طوايف هلي هسه رايحه احطلك لگمه .. طلعت امي. شمرت الخاولي ع كرسي خالينه بركن الغرفة .. تمددت ع جربايه. ماكدرت اغفى احس نار ومشتعلة بيه .. ماجاي اگدر انام .. كمت من الفراش .. واذا حرارة الجو 56 انا حرارتي الف. دقايق ودخلت امي. .. يمه ايوب الجدورة مابيهن تمن ومرك تريد اكليلك بينذان* ؟ .. يوميه ماتخلولي تمن ومرك عبالك البطه السوده اي گليلي خلي اسكت وصاويص بطني سطرتني .. ..هسه.. اكليلك واكل واسكتها واسكت ابيهه .. ..اي خوش ازامطين يمه .. .. اي شعدي غيرك احبل اجيب شو ابوك ومات .. طلعت من الغرفه وبقيت مدد ورا ربع ساعه رحت للمطبخ .. شفتها كاعده بالكاع وماده رجليها وبصفها ماعونين واحد بي كشور بيذنجان والثاني بي بيذنجان مكصص دوائر .. .. هاا يمه ماگليتي؟ .. يمه مابيه اكوم ريلي(رجلي) تعورني .. .. عبالي گليتي من مساع لهسه .. .. والله يمه هالسوفان بركبتي موتني اتاني اشواق تجي وتوديني للدكتور .. .. اي اي تلاگينها هسه بجورجيا مدري بماليزيا تتونس هي بالصيف وين تكعد بالبصره على هالرطوبه والظيم والحر والشرجي .. وفلوسها وين توديها تروح تتونس بيها .. لا يمه وداعتك راحت لاربيل تشوف امان خطيه ابنها صارلها شكد ماشايفته خطيه .. وشبي مايجي هنا يشوفها شو صار بكد البعير انت ماترضين من احجي عليها مختصر مفيد يمه بتج ماتشبع من الفلوس حتى ابنها امان مارحمته بالدوام يدرس ببغداد وبالعطله تدزه لاربيل يشتغل .. .. اي غير حتى يصير إزلمه .. .. وليش هالكد مهلكته وين تودي راتبهه مو استاذة جامعه وهالله هالله ورجلها دكتور .. اكلج يمه انت تموتين على شويقه ولاترضين واحد يفك حلگه ويحجي عليهه .. وهي ناسيتج ورايحه تتونس. .. شسوي يايمه هي ظلت هالوحده بعد موت اختك امال خطيه .. .. اي الله يرحمها .. .. هسه اصير زينه واكوم اگلي .. .. لا گومي ارتاحي انه راح اسويلي اكل .. سحبتهه من ايدها وديتها للهول كعدت ع المندر .. رجعت انه للمطبخ .. تناوشتلي راس بصل .. ثرمته ناعم ورشيته ملح طلعتلي طاوه .. خليت بيهه دهن وخليتها ع النار انتظرته يحمى ذبيت بي البصل المثروم طلعتلي بيضتين من الثلاجه طكيتهن خبطتهن ورشيتهن ملح .. وذبيتهن ع الزيت والبصل انتظرتها تستوي وتصير لونها بني .. واطرافها تگسب شويه .. هيج احبها .. فرغتها بماعون طلعت خبز وكعدت اكل. دخلت امي .. رفعت راسي گتلها. كعدي اكلي وياي. .. لا يمه اخاف من الكوستركول .. .. كوستر؟ خاف كيا؟ زين بعد شكد الها وتقبط؟ .. نفرين .. هههه يمه اسمه كولسترول .. .. شمدريني انه أفادي(فؤادي) غادي نار وانت تنكت .. .. شبيه افادج بعد؟ .. بالي يم لبنيات خاف يصير بيهن شي.. ..والله انت بالج يم شويقه. .. لا والله يمه افكر ابناتك .. .. يمه الحياة صعبه ومو اي واحد يگايش بيها خليهن ياخذن درس ويشوفن الفرق بين وابوهم ودرب الچلب؟ .. ع الگصاب خبصتني. .. اي يرجعن يرجعن لاتخافين اذا مو اليوم باجر واذا مو باجر بعد شهر .. والصونده والجداحه على اهبة الاستعداد .. ... اوووو خلصت اكل .. شلت المواعين خليتهن بالسنگ وبديت اجلف بيهن .. أم أيوب .. يمه خليهن انه اموصهن (اغسلهن) .. ..لا يمه مابيج انه هسه اغسلهم ماعندي شي. غسلتهم ورحت للغرفه اخذت ملابسي ورحت للحمام خليت ماي بالطاسه وكعدت اجلف بيهن لو واحد غيري متزوج بس خفت ع بناتي لاتظلمهن مرة الابو .. او شون جازني خلني وشردن .. خلصت جلف الملابس شطفتهن ورحت شريتهن .. جانت رقيه هي مسؤؤله عن ملابسي وصفا تطبخ وتسوي اكل .. سميه لو نايمه لو مكا**ه التلفزيون. رحت للغرفه بدلت ملابسي .. واخذت فلوس. وطلعت دورت امي .. شفتها بالهول جاي تباوع مسلسل تركي .. مديت ايدي ونطيتها الفلوس .. رفعت راسها باوعتلي گالت مشانيش (المن)هي الفلوس يمه ؟ .. يمه خلي ام إسلام توديج للدكتور علمود رجلج. .. لا يمه خاف ماعندك ..؟ .. عندي ومدام البنات يم امهن الملعونه فكا توفير مصاريف زايده .. اخذتهن باستهن وجه وگفا وظلت تدعي .. نعم الله عليك يمه الله يرزقك من بر وبحر يبعد طوايفي واهلي كلهم .. بست راسها وطلعت .. دكيت الباب على بيت اخوي المرحوم .. طلعتلي بته ايناس .. هاا عمو شلونك .. هلا انوسه بيبتج بالبيت ديروا بالكم عليها خاف اتأخر انه لاتخلونها .. بحدها (وحدها) .. ان شاءالله عمو هسه اروح يمها اي عفيه بنيتي فيمانالله (في امان الله) الله وياك عمو .. رحت لسيارتي سقتها خذيتلي جم كروه رحت للكورنيش يم ربعي ( اصدقائي) نركيله وسوالف ومنظر شط العرب بالليل يأسر الروح وياخذها لغير عالم الاضويه معكوسه بالماي ونسمات هوا عليله ونقيه تداعب الاحساس وتنعشه .كل هذا وفكري يم بناتي اكيد ..تعشيت . و رجعت للبيت .. بالليل .. دخلت السياره بالكراج .. فتحت الباب من اليده ماانفتح مبين مقفول يعني امي مو بالبيت فتحته بالمفتاح ودخلت .. ظلما شعلت الاضويه طلعت تليفوني .. خابرت إسلام سألته على امي گال يمنه ونايمه هسه .. سبحت بدلت ملابسي .. وتمددت ع الجربايه .. انه ايوب عمري 45 سنه .مطلق وعندي 3بنات سمية وصفا توأم وعمرهم 17 سنه .. رقية .. عمرها 15 سنه .. . نرجع للوراء قبل 19 سنه تقريبا .. من اطلع من البيت مرات اشوفها طالعه وي امها .. او للمدرسة .. جانت بالنسبة الي حلم .. نظراتها الجريئة وابتسامتها المثيرة شغلي الشاغل .. منطقتنه محافظه واغلبهم فلاليح واهم شي سمعة البنيه عدهم .. اغلب الشباب ينجذبون للبنت المؤدبه. لكن انا! !!! هذه جذبتني .. جانت صغيرة عمرها 14 لكن جثلة يعني بنيتها ضخمه .. الي يشوفها يگول عمرها 20 .. حبيتها كلش .. فاتحت اهلي بالموضوع .. كتلهم اريدها .. تخبلوا تخبلوا .. خاصة اشواق .. تكرها تموت منها .. وانت شون تاخذ بنت الدلالة .. مالگيت غيرها؟ شنو گلة(قلة) نسوان .. ومن هالحجي .. امي وابوي واخواني كلهم نفس الموقف يكولون عليهم سمعتهم موزينه ابوهم سكير وامهن دلالة .. بس انه جان تفكيري غير .. جنت اشوفها طفلة بريئه ومامسويه العيبه .. وراح اربيها على ايدي .. ردت احد يروح يخطبها الي محد قبل يروح .. . مرت ايام واجت ايام وانه اتوسل وكلهم معارضين ومحد قابل .. يوم عن يوم وانا اريدها بكل جوارحي .. كلهم جانوا يكولون وكحه بس انه ماجنت اشوفها هيج. حتى لامها رحت وكتلها اريدها كالت تره تعذبك وتشوف الويل منها .. توقعوا حتى امها حذرتني منها. هنا مقولة الحب اعمى جانت متفعله عندي جنت اعمى ومااشوف وكاحتها .. بس حبها انزرع بگلبي وصار ينبض باسمهه .. فد يوم ضاقت بيه السبل .. اخذت رجال من المنطقه اله فد صيت جبير والناس تحبه ورحت خطبتها وانطاها الي ابوها جان يوم سعد بالنسبه الي .. بعد سنه كامله من المحاولة .. اجرت بيت وتزوجتها زواج بسيط ماحضره احد من اهلي .. رغم حزني لكن فرحت بعروسي .. صارت الي اماليد العشق .. جنت متعين شرطي مرور صح الراتب مو شي بس كدرت اجر شقة ع كدنا .. جانت ببداية زواجنا مطيعه حاولت امشيها ع طريق الزين .. وفعلا ماشفت منها شي .. صار عدنه بنات اثنين توأم مختلفات بالشكل غير متماثلات وحتى اختلاف بالشخصية .. مرت سنتين صارت عدنه رقية .. خرساء ماتحجي كلش تأثرت من عرفت خرسه شكرت الله وحمدته على نعمته شسوي .. أهلي بس بالاعياد اروح اشوف امي اعيدها . اجت علينه سنه . توفى بيها ابويه .. حزنت كلش مات وماراضي عني .. بعده توفى اخويه ابو إسلام بحادث .. توالت عليه المصايب ماارتاحيت كلش .. انتقلت لغير شقة .. هنا كل شي تغير ارجع للبيت فجاأه ماالاكيها اسأل البنات جانن زغار يكولن يم صديقتها من تجي .. يوميه تسريحه شكل وصبغ شكل .. تكول جنت بالصالون صالون يوميه؟ ؟ والله ياايوب بناتك كبرن ويحتاجن مصاريف وانه هم جاي اروح للصالون اشتغل شويه وارجع. .. وانه هنا شنو طرطور ليش ماتكليلي راح اطلع؟ .. ادري بيك ماتقبل لهيج ماگتلك .. .. ادري مقصر وياج انه مقصر ويا بناتج هذا الي اكدر عليه وجاي ابذل كل جهدي بعد شسوي؟ ؟ .. ادري ياايوب هي كل طاقتك وماتكدر شسوي ماتكولي الايجار ماخذ نص الراتب وياريت شقة بيها خير اثاث بي خير. .. الحمدلله احسن من غيرنه .. يااماليد وبعدين بناتج زغار والوضع مو تمام شون تعوفيهن هنا وحدهن. .. ماعليهن شي صفا وسميه كبار ويكدرن يهتمن حتى برقية .. .. اماليد هي السالفه تنسينها روحه للصالون بعد ماكو افتهمتي واذا رحتي رجليج ا**رهن .. .. شنو تايهتلك وت**رلي رجليه؟ .. تايهتلي زوجج وغصبا عليج وااضح .. وهذا الموضوع ينسد انا راح احاول الگالنه غير مكان .. احسن من هذا .. عفتها مرت ايام .. هم ارجع مااشوفها واكتلها ومايفيد ولا جنه اكتل واصيح واحجي تركدلها جم يوم وترجع وتروح وارجع مااشوفها .. حبستها بالبيت وماظلت تطلع حياتنا انقلبت رأسا على عقب .. مشاكل ض*ب وصياح وعناد طبخ ماتطبخ كله البنات وهنه صغار ارجع اشوف حتى ايديهن محركات من الگلي كله هذا عناد ماتطبخ وتلح تريد تشتغل .. فد يوم اجت سمية وكلتلي يابه تره امي تخابر ولد وتضحك وتسولف ووو .. انصدمت لزمتها جنزتها تجنز اض*بها بو**ي توكع بالكاع ثواني وتكوم مابيهه شي وتعارك وتغلط وتصيح كتلتهه وشمرتها على اهلها .. خذيت بناتي ورحت لبيت اهلي .. الي هسه ساكن بي ..امي استقبلتني بس سليمان وجهه ثكيل عليه. ومايشتهي بناتي كلش. اشواق ظلت فترة ماتحاجيني .. وماتجي للبيت. . سليمان جان ساكن بالبيت بقينه سوا فتره. بعدها البيت قديم والغرف بايده .. شال بغير بيت. شكد حاولت اماليد ترجعلي مارجعتها تندمت على اليوم الي حبيتها بي .. حاولت تاخذ البنات مني بكل السبل بس ماكدرت انا انتصرت عليها .. لان اهلها مايردوهم .. طلگتها وانتهى كل شي بينه ..سمعت بيها تزوجت حسيت انا الخسرت كل شي وانا الي تضررت .. هي ولا هامها .. سمعتها بالحضيض يوميه اسمع عنها سالفه مو حلوه .. رجلها سكير .. شكد حاولت امي تزوجي چزت روحي من النسوان بعدها .. كرهتهن كلهن .. وهي قصتي وي اماليد باختصار ماكدرت اسيطر عليها ماكدرت احتويها .. مااعرف شنو خطئي وبناتي شنو ذنبهن .. مرت ايام منو يشوفني من اهلي يكولي روح جيب بناتك وخاصة اسلام وسليمان كلما يشوفوني وغير الحاح امي بالبيت .. بعد مرور شهر .. جنت طالع بكروة .. لمكان بعيد .. دگ تليفوني .. رفعته .. شفته اسلام جاوبته .. گال .. عمو خابرني فراس.. صديقي وابن جيرانه يكول شفت بنات عمك .نزلن من سيارة واحد شمرهن شمر . بالشارع رايحلهن يحاجيهن خايفات ويبجن وحالتهن مزرية .. كلت خلي اخابرك كبل لااروح الهن. .. لااا بشرفك وين بيا منطقه؟ ؟ .. يكول على طريق القصور مشمورات .. .. خاب انه بعيد هسه صوب الفاو طالع روح رجعهن للبيت .. وانا اوصل الكروة العندي وارجع .. صار عمو .. .. ظليت اسوق ماادري شلون وافكر بيهن شنو صار وياهن بس نار جواي واريد اطفيها وصلت الناس الي مأجريني وسقت للبيت .. خابرت أسلام .. هاا اسلام رجعتهن .. اي عمو ابيتكم هسه .. خوش سديته منه وكملت طريقي .. وصلت للبيت دخلت السياره بالكراج .. ونزلت منها .. جان اكو صونده رفيعه بالحديقه .. ملصتها ودخلت للبيت وانه اصيح بأعلى صوت عندي ... وينهن وينهن ........... يتبع ..