Kinben I

Bola 42

KINABUKASAN, inilibing ang lola ni Kier, lahat ng CISA Varsity ay naroon para samahan ang kanilang kasama sa paghahatid dito. Ramdam nila ang kalungkutan kay Kier, ngunit tila binawasan iyon ng larong ipinanalo nila kontra CCC. Naglaro nga si Kier at humabol para sa kanyang lola. Iyon ang larong inialay niya sa mahal niyang lola kaya siniguro niyang magiging maganda ang kanyang laro.

Masakit para sa binata iyon pero masaya siya kasi bago ito umalis ay nakita na niya ang kanyang totoong team. Ang kanyang mga kaibigan sa paglalaro ng basketball. Mga kasamang katulad niya, lahat sila ay masayang naglalaro nito.

"Kier, hihintayin ka namin sa school?" Nakangiting wika ni Reynan bago umuwi ang mga ito matapos ang libing.

Isang tapik naman sa balikat mula kay Macky ang ibinigay nito kay Kier.